再談《十二夜》
-
尋晚喺大銀幕前重睇《十二夜》，
感觸反而在於結局。
究竟點解由張栢芝演嘅Jeannie，
最後要避開Alan陳奕迅
斷送一段大好姻緣?
-
究竟愛情係咪命中注定？
-
《十二夜》嘅故事，由阿傑(謝霆鋒)嘅悵然若失，暗示同女朋友感情出現危機開始。由第一夜倏忽去到第十二夜，Jeannie由Johnny(鄭中基)嘅女朋友，變成Alan嘅女朋友，最後再遇到阿傑，呼應首幕。
-
Jeannie一開始點解會離開Johnny？係因為好朋友幫佢占卜塔羅牌，話Jeannie同Johnny嘅感情唔會有好下場，會互相欺騙，而另外一位好朋友亦火上加油，話佢好似見到Johnny同個鬼妹喺埋一齊。由嗰一刻開始，Jeannie已經決定要同男友分手，然後喺同一晚，佢再遇到自己人生中另外一個命中注定嘅男人，Alan。
-
喺Jeannie眼中，佢同Alan係天造地設嘅一對，將佢由分手嘅深淵中拯救出嚟，係幫佢由感情輸家變成贏家嘅及時雨。而十二夜，就即係十二個愛情必經嘅階段，兩個人愛過、甜蜜過，亦都冷戰過、爭吵過，去到最後女方要去夏威夷工作，而男方亦果斷犧牲香港嘅事業，請咗一年大假陪女朋友。呢個機會，理應係二人關係更進一步嘅關鍵。
-
但點解，喺兩個人關係出現曙光嘅時候，Jeannie突然決定避開Alan，要同對方分手？喺第十二夜，Jeannie返咗去前男友Johnny度執嘢，然後佢驀然發現，原來ex根本就無出軌，嗰時之不過係佢太迷信同埋朋友認錯人，搞到佢魯莽分手。
-
命中注定嘅Bubble一旦被刺穿，
Alan喺Jeannie心目中，
就唔再係一個可愛嘅人。
-
究竟Jeannie同Alan嘅相愛，係命中注定，定只係偶然？喺故事嘅最後，Jeannie覺得係後者，覺得一切都再無意思，所以選擇分手。
-
但佢從來都無諗過，佢哋兩個之所以係愛上對方，其實就係因為連串錯誤嘅巧合，包括好朋友唔準嘅占卜結果，包括好朋友嘅認錯人，包括Alan同前女友嘅感情衝突，包括Johnny嘅拒絕解釋同追問，包括兩個人喺的士鏡中嘅相襯。喺呢個角度，兩個人嘅相遇，係咪又係另外一種注定？
-
所有嘢都係偶然，
但同時所有嘢又係另一種注定。
-
與其執著於自己同對方係咪天生一對，點解唔真真正正嘗試去諗，點解自己會鍾意對方？點解唔真真正正嘗試同對方溝通，搵出一個大家都相處舒服嘅模式，將彼此由命中注定嘅虛妄，逐步逐步變成互相扶持嘅真正伴侶？
-
唯一注定嘅係，若果只著重一時嘅感覺，全憑一時嘅衝動做決定，人永遠都無法擺脫十二夜嘅苦迴圈，永遠徘徊於患得患失嘅關係，永無止境。
Search